元朗永年車仔麵VS灣仔車仔麵之家

台主︰元朗 永年士多

以前有幫襯過永年既舊客都知，食永年除左要等候長長既人龍之外，落單亦要背好條FORMULAR。

首先要留意淥麵既人兄，當佢一同你對眼半秒，你就要講出想要既麵底，之後排到去窗口再一口氣講晒你要既餸(千其唔好到時先慢慢揀)，仲要講低要唔要辣、係唔係到食先好去俾錢既位置，否則就會俾伙計怒睥。

但係新裝修之後就無哩枝歌仔唱喇，排隊比以前快咗，落單亦換左其他人，但無咗壓力又好似少左D風味(真犯賤)。

言歸正傳: 永年車仔麵湯底好夠味，辣汁係秘製辣醬，唔係普通加辣椒油既麵店，所以就算小辣已經好夠味，而且完全唔會有油膩既感覺。

除左湯底之外，餸都好好食。首推鹵水大腸同雞翼尖，大腸有濃濃既鹵水味，而且清理得好乾淨，絕對令人忘記佢曾經運送豬屎既重任，連不少平時唔好內臟既朋友都覺得好食。

跟住推薦人工加工既勁甜蘿蔔，配埋湯底同辣汁時調味一流！

雖然聽聞部分人覺得味道太鹹，但我又無咁既感覺，所以係重口味人士必食之選！

美味指數:9分 價位: 3餸1麵 $29 + 汽水 $7 地址: 元朗豐樂里6號寶城洋樓地下 [近朗屏西鐵/元朗豐年路輕鐵] 門口有位泊車，但有抄牌危機 營業時間: 中午12點-晚上9點

挑戰者︰灣仔 車仔麵之家

余文樂推薦既車仔麵之家，亦曾經上過《飲食男女》，衝住佢好評，當然要試一試！

店內無提供座位，只有旁邊一排約4-5個企位，但仍然有唔少人排隊買外賣，甚至攞住碗麵企出去食。

同永年一樣，當你一排到門口位，裡面就會有人叫出黎:白聲衫個位要咩麵呀？係呀！叫你呀！呢一刻我先發現，原來被嫌棄係車仔麵既特色之一。

我哋試咗小辣湯底，而餸方面就揀咗大熱既甜酸齋同魷魚，另外仲有魚蛋、豬皮、雞翼尖同蘿蔔。

湯底味道係小甜微咸，無特別湯頭/醬汁味道，而小辣亦食唔出辣味(建議嗜辣既朋友由中辣開始)。

餸方面，比較特別係甜酸齋，唔係好多舖頭有得食之餘，味道亦唔會過重，蓋住湯麵本身既味道，但門口推介既魷魚就比較普通，味道偏甜但咖哩味唔夠濃，口感亦唔夠爽脆。

至於魚蛋、豬皮同雞翼尖比普通小食店都整得更唔入味…

唯一值得稱讚既就係蘿蔔，切得細細舊，味道清甜，亦唔會有渣。

因為環境迫夾，我哋已經冒住俾店員鬧既危險影幾張相，食完就即刻動身走人。

結論一致係︰味道好普通，同永年差幾皮。不過喺灣仔哩D貴價地段而言，都算價錢相宜！

美味指數:5分 價位: 3餸1麵 約$32 地址: 灣仔晏頓街1號A [近灣仔地鐵站/巴士熙信大廈站] 營業時間: 星期一至六 7AM-6PM ( 資料來源︰Openrice)